Një grup i përzgjedhur ekspertësh ndërkombëtarë u ftua për të përjetuar një eksperiencë të paharrueshme mes Balocco-s, Areses dhe Torinos. Qëllimi? Një “zhytje e thellë” në krijimin, historinë dhe veçoritë unike të legjendës Alfa Romeo 33 Stradale.

Ky udhëtim i jashtëzakonshëm emocional dhe teknik u nda në tre etapa kryesore. Së pari, testimi në pistë i prototipit "00" në ambientin legjendar Balocco Proving Ground, ku supermakina tregoi performancën mbresëlënëse dhe teknologjinë e saj të jashtëzakonshme. Më pas, pjesëmarrësit vizituan “Bottega Alfa Romeo” në Arese – një hapësirë ku përjetuan eksperiencën e vërtetë të klientit, duke konfiguruar versionin e tyre të 33 Stradale përkrah dizajnerëve, inxhinierëve dhe historianëve të markës. Në fund, një vështrim i thelluar mbi procesin e mrekullueshëm të prodhimit në bashkëpunim me Carrozzeria Touring Superleggera, në Torino – një shfaqje e përkryer e mjeshtërisë italiane.

Rezultati? Një sukses absolut. Edhe një herë, 33 Stradale vërtetoi se është më shumë se një makinë – është një vepër arti. Një ndërthurje perfekte mes teknologjisë së avancuar dhe artizanatit të përkryer. Një model i krijuar për të nderuar legjendën e padiskutueshme të vitit 1967, që ka bërë histori dhe vazhdon të frymëzojë, duke dhuruar emocione të papërshkrueshme sa herë je në timon.